არდადეგების შემდეგ აჭარაში დავბრუნდით:) ამჯერად ახალციხესთან განშორება მეტ-ნაკლებად ადვილად გადავიტანეთ მეც და ტატომაც:) თუმცა ამ მეტ-ნაკლებობაში იმას ვგულისხმობ, რომ არ მიტირია, ემოციური განწყობა კი მაინც იგივე მქონდა და ახლაც მაქვს.
ახალი წლის დადგომასთან ერთად ჩვენს აქაურ სახლს ახალი სული შთავბერეთ, ბათუმში ტელევიზორი და გობი (ანუ პარაბოლური ანტენა, აქ ,,გობს“ ეძახია) ვიყიდეთ და ახლა უფრო გვიადვილდება აქ ცხოვრება. როცა სახლში ერთ-ერთი ყველაზე აქტიური და მნიშვნელოვანი ,,წევრი“ ლაპარაკობს დილიდან-საღამომდე (ჩვენთან ღამეც), ადამინებს სიმშვიდის გრძნობა ეუფლებათ ხოლმე. სწორედ ასეთ მდგომარეობაში ვართ ჩვენც, ჩვენი ახალი ,,წევრის“ წყალობით.
ერთი, რაც ყველაზე ცუდი რამ დაგვემართა, აქ ჩამოსვლის შემდეგ ის არის, რომ ჩვენი ლეპტოპი გაფუჭდა და მხოლოდ ტელევიზორის ამარა დავრჩით:)
ჩვენი ანტენა კარგი ხარისხითა და ჩვენებით მხოლოდ თურქულ, აზერბაიჯანულ და რამდენიმე ყირგიზულ არხს იჭერს, ხოლო ქართული არხების ყურების საშუალება შიგადაშიგ, ხან ორდღეში ერთხელ, ხან დღეში რამდენიმე საათის განმავლობაში გვეძლევა. ალბათ, ანტენა კარგად არ არის დამონტაჟებული და სწორი მიმართულება არ აქვს. ტატომ ბევრი იწვალა მის დამონტაჟებაზე, თუმცა ვერაფერს გახდა და ბოლოს დავმორჩილდით ბედს, დავიწყეთ თურქული არხების ინტენსიური ყურება და თურქული ენის სწავლა:) სხვათა შორის, ყველაზე ადვილად გასაგები სერიალები აღმოჩნდა:)
ქართული არხებიდან ყველაზე კარგად აჭარის 25-ე არხს იჭერს ჩვენი ანტენა. ამ არხზე მთელი დღის განმავლობაში გადაიცემა მედია-კავშირი ,,ობიექტივის“ გადაცემები. არ ვიცი ამ მედია-კავშირის შესახებ ვინმეს გაგონილი თუ გაქვთ. ეს არის რადიკალურ-ოპოზიციური კავშირი და ასეთივე გადაცემებსაც აკეთებს. მოკლედ, თუ ამ არხს ცოტა ხანი უყურებთ, საბოლოო ჯამში, შეიძლება ჭკუიდან შეიშალოთ:)
აი სულ ეს არის, რაც ამ ორი კვირის განმავლობაში ,,გადაგვხდა“ თავს. დანარჩნი ძველებურად დარჩა ყველაფერი. თალიბა პაპა ისევ გვსტუმრობს, მე ისევ დავდივარ სკოლაში და ისევ განვიცდი შაბათ-კვირას, როცა მთელი დღე სახლში მიწევს ყოფნა და დრო ძალიან ნელა მიიზლაზნება. ისევ თოვლია აჭარაში და ღამ-ღამობით ისევ ძალიან ცივა.
Comments
Post a Comment