ორსულობა და მოდა

რატომღაც მეგონა, რომ დავრჩებოდი თუ არა ფეხმძიმეთ მეორე თუ არა, მესამე თვეში მუცელი უკვე ისეთი დიდი მექნებოდა, რომ ყველა შეამჩნევდა ჩემს მდგომარეობას. თუმცა ასე არ მოხდა. ახლა ვხვდები, რომ ყველაფერი ადამინის აღნაგობაზეა დამოკიდებული.   მიუხედავად იმისა, რომ უკვე მეექვსე თვეში ვარ, მაინც არ მაქვს ძალიან დიდი ღიპი:) ყოველ შემთხვევაში, ბევრი მეუბნება, რომ საერთოდ არ გეტყობაო. ეს ცოტა არ იყოს მაღიზიანებს, მაგრამ ხალხის უაზრო და უადგილო კომენტარებს ისე შევეჩვია, რომ ყურადღებას აღარაფერს ვაქცევ:)

მოკლედ, რა მინდოდა, რომ ამით მეთქვა: მიუხედავად იმისა, რომ ჩემი მუცელი საკმაოდ გვიან გახდა შესამჩნევი ფართო საზოგადოებისთვის, ნუ იფიქრებთ, რომ არ გავსუქებულვარ ამ რამდენიმე თვის განმავლობაში :) პირიქით, ძალიან მოვიმატე წონაში.

თავიდან, ალბათ, როგორც ყველა მეც ვღელავდი გასუქების ამბავს, თუმცა მერე ვიფიქრე, რომ ამით შეურაცხყოფას ვაყენებდი ჩემს პატარას. ამიტომ გადავწყვტე ბოლომდე დავმტკბარიყავი 9 თვით, არ მეღელვა სიმსუქნეზე და მეჭამე როცა მინდა, რაც მინდა, რამდენიც მინდა (ხუმრობით, რა თქმა უნდა. არც ორსულებისთვის შეიძლება ზომა გადასული კვება). კიდევ როდის დამიდგება ეს დრო ვინ იცის:)

ჯინსებსა და მოტკეცილ მაისურებზე ძალიან მალევე ვთქვი უარი. აღარც ახალი შევიძინე, მალე უფრო დიდი და დიდი უნდა გავმხდარიყავი და რა აზრი ჰქონდა?! საკმაოდ მშვიდად შევეგუე უჯინსობას (თუ გავითვალისწინებთ ჩემს სიყვარულ შარვლების მიმართ, ეს გასაკვირიც კი არის) და გადავედი ქვედაბოლოებისა და კაბების სამყაროში. სამაგიეროდ, ახლა უფრო ქალური ვარ :)

თავიდან ტანსაცმილის შერჩევასთან და ყიდვასთან დაკავშირებით პრობლემები არ მქონია. მერე და მერე უფრო გამიჭირდა შესაბამისი ტანისამოსის მოძებნა ახალციხეში (მე ახალციხის გადმოსახედიდან ვსაუბრობ ამ თემაზე, რა თქმა უნდა, თბილისსა და სხვა ქალაქებში შეიძლება უკეთესი მდგომარეობა იყოს). სწორედ, ამან გადამაწყვეტინა ამ პოსტის დაწერა.

ორსულობა არ ნიშნავს იმას, რომ ლამაზად და მოდურად არ უნდა გამოიყურებოდე. მართალია, მე ამას ძალიან ზედმიწევნით არ ვასრულებ (მაგ. წარბების ამოღება მეზარება, არ ვიკეთებ მაკიაჟს...), მაგრამ ლამაზად ჩაცმას ნამდვილად ვაფასებ. ხოდა, როგორც კი შევატყე, რამდენიმე თვეში, რომ ჩემი პატარა მუცელი არც ისეთი პატარა იყო, გადავწყვიტე შემერჩია ლამაზი და თან მოსახერხებელი ტანისამოსი, რომელსაც სამსახურშიც ჩავიცმევდი. და ჩემი პრობლემებიც მაშინ დაიწყო:(

ახალციხე ნამდვილად არ უჩივის მაღაზიათა სიმწირეს, თუმცა ძნელად თუ იპოვი საორსულე ტანსაცმელს. გავიხუმრე კიდეც, რომ ტანსაცმლის მხრივ ორსულთა დისკრიმინაციაა-მეთქი. ფაქტიურად, არჩევანის საშუალება არ გეძლევა. არის, მაგრამ არის ერთი ან ორი და ისიც, შეიძლება ან არ მოგიხდეს, ან არ მოგეწონოს. ყველაზე ადვილი კაბების და მიასურების ყიდვა აღმოჩნდა, თუმცა დიდი არჩევანი არც აქ იყო. 

ბოლოს მივაკითხე ,,სექენდ ჰენდს“ და, თქვენ წარმოიდგინეთ, აქ უფრო ვნახე შესაფერისი სამოსი:) და თანაც დაბალ ფასებში. ორსულობისას ტანსაცმელში არც ღირს დიდი თანხის მიცემა, გავა 9 თვე და შეიძლება ვეღარც ჩაიცვათ. ამიტომ ყველა ორსულს გირჩევთ შეიაროთ ხანდახან ,,სექენდ ჰენდში“, ნამდვილად საინტერესო ,,შოპინგი“ გამოგივათ:)

ასეთმა სავალალო მდგომარეობამ მე და ტატო ბიზნესის დაწყებაზე დაგვაფიქრა: ხომ არ გაგვეხსნა საორსულე ტანსაცმლის მაღაზია?! :)